ERASMUS+

O curso rematou sen poder facer a viaxe a Turquía dentro do programa Erasmus+ debido ao estado de alarma pola COVID-19. Foi unha mágoa!

Con todo, os intregrantes deste programa non  quixeron despedir o curso sen facer a exposición da tarefa final coa visita que realizaron a Polonia e a dos socios turcos e polacos ao noso centro en outubro-novembro.

Por iso vos deixamos aquí as fotos.

Trátase dun libro xigante con fotos das visitas; caixiñas co vestiario tradicional dos tres lugares e monequiñas para vestilas con el; fotos en  álbums que imitaban móbiles e tabletas, debuxos dos lugares monumentais, etc.

Agardamos que o vindeiro curso poidamos seguir con esta formidable experiencia!

Saúdos!

Erasmus Plus

O instituto este curso embarcouse nun programa emocionante, unha aventura que ata o da agora foi moi satisfactoria e frutífera: o programa Erasmus Plus. Os nosos socios son centros que pertencen a Ziebice (Polonia) e Aydin (Turquía).

En novembro viñeron visitarnos profesorado e alumnado de ambos países. Os alumnos e alumnas instaláronse con familias do noso alumnado. Houbo un montón de actividades que desde vicedirección e un equipo de traballo organizaron. O tema é a loita contra o acoso escolar co lema Adeus bullying, ola amigo.

Houbo recepcións nos concellos de Barbadás e de Ourense, saídas culturais (a Santiago de Compostela, ao Museo da Gaita...), xornadas gastronómicas (no IES  de Vilamarín), celebramos xuntos o magosto; fixemos a gravación conxunta dun Lip Dub contra o acoso escolar e un festival onde compartimos música galega, algo moi emotivo, pois tocaron conxuntamente cancións galegas profesorado e alumnado visitante e propio.

Velaquí un breve vídeo con algunhas desas cancións que compartiron con nós os visitantes.

Na semana do 3 ao 9 de febreiro seremos nós quen acudamos ao instituto de Ziebice en Polonia para vivir esa experiencia. Será unha inesquecible vivencia tanto para o profesorado como para o alumnado asistente.