Concurso de caretas. Entroido 2018

 

O departamento de Educación Plástica e Visual, en colaboración co EDLG, propuxo a actividade de elaborar caretas de Entroido con material de refugallo, con elementos reciclados.  A actividade estaba orientada para o nivel de 1º da ESO baixo a modalidade de concurso. Ampliouse a participación tamén para o alumnado de 2º da ESO.

Os resultados foron espectaculares e, tras  axustada votación, os gañadores foron os seguintes:

1º Premio para esta preciosidade realizada por Naiara Quintas Gómez, de 1º ESO B 

2º Premio: Uxía Valado Seara, de 1º ESO B

 3º Premio: Adrián Martínez Peña, de 1º ESO B.

Mirade outras caretas participantes. Verdade que son espectaculares?

Actuacións do Entroido 2018

Como xa explicamos na anterior entrada, o alumnado de 1º de bacharelato organizou o festival do Entroido deste ano.

Velaquí un vídeo que recolle fragmentos dalgunhas desas actuacións. Sentimos non poder recoller todas e con mellor imaxe e son, mais non dispoñemos de medios técnicos para facelo.

Parabéns a todo o alumnado participante e a toda a comunidade educativa.

Charanga: 

Festival de Entroido 2018

Debemos empezar esta entrada dando os parabéns ó alumnado de 1º Bacharelato pola magnífica organización do festival do Entroido deste curso. Como cada vez somos máis no centro, decidiuse repartir en dúas quendas a asistencia ós concursos de disfraces e actuacións. Mentres os alumnos e alumnas dos cursos máis baixos  mostraban as súas galas e actuacións no salón de actos, os de terceiro, cuarto e 2ºbacharelato asistían a unha competición de varias probas de habilidade e destrezas por equipos no pavillón de deportes. Os organizadores desta actividade e os coordinadores foron os propios alumnos/as de 1º bacharelato. A continuación cambiaron as tornas. E os maiores foron os que nos ensinaron a súa faceta de esmorgantes e artistas.

Velaquí algunhas fotos e un vídeo coas fotos da festa:

Hashtag #FerroAmor no Día dos namorados

ESTE ANO NO #DíaDosNamorados

  TRIUNFA O #FerroAmor

NO @endlferro

FAI TEU O HASHTAG #FerroAmor 

do #iesFerroCouseloOurense

O 14 DE FEBREIRO

Anímate!

Usa o teu twitter ,

lanza o teu chío

#FerroAmor.

Tamén amor á lingua.

Visita ao Pergamiño Vindel

Pergamiño Vindel

Estando en Galicia exposto o Pergamiño Vindel (finais do séc. XIII), non podiamos deixar de ir visitalo. É a primeira vez que sae da cidade de Nova York, onde está desde hai corenta anos na Morgan Library & Museum. Este pergamiño, descuberto polo libreiro Pedro Vindel en 1914 na súa librería, era o forro dun exemplar do libro De officiis de Cicerón, do séc. XIV con encadernación do séc. XVIII. Está exposto ata o 4 de marzo no Museo do Mar (Vigo). 

A visita á exposición foi unha actividade organizada polo Departamento de Lingua Galega e o EDLG para o alumnado de 1º bacharelato. A guía explicounos moitas cousas sobre este pergamiño en pel de vaca que contén sete Cantigas de Amigo do poeta Martín Códax. Como por exemplo, que ten tres inxertos de pel, que o pentagrama está en clave de DO, e que foron dous os amanuenses que copiaron as cantigas. Tamén que deixaban unhas marquiñas ao lado das letras capitulares para que os ilustradores souberan se as debían pintar en vermello ou azul.

Por suposto, tamén visitamos as distintas salas do Museo do Mar e o acuario.

O outro lugar que visitamos foi o Museo-Pazo Quiñones de León, no parque de Castrelos, tamén en Vigo. É un pazo moi fermoso, con mobiliario antigo, pinacoteca e dúas salas de arqueoloxía castrexa e romana. Os xardíns son excepcionais e merecen unha visita relaxada.

Fusaiola

Despois de xantar, e antes de regresar a Ourense, fixemos varias fotos ante a escultura de Xulio Verne que hai fronte ao Real Club Náutico.

Foi unha xornada espléndida e divertida!