Preparación das tertulias literarias

Proximamente teremos a I sesión das Tertulias Literarias do curso 2013-14 no Liceo de Ourense. Mentres chega o día, que será o 12 de febreiro e a conferencia do autor o 13,  estamos preparando a tertulia e os debates coa lectura pormenorizada da novela Faneca Brava de Manuel Portas.

Humor... e poesía

A volta ás aulas ás veces faise pesada, non? Pois para animar este regreso á rutina nada mellor que un toque de humor. Este vídeo reúne humor, crítica e... poesía.

Kevin, poeta é o título deste vídeo. A poesía sóavos, non si?
Velaquí unha pequena homenaxe (con humor) a Rosalía de Castro.

Festival de Nadal 2013

E chegou o día das vacacións de Nadal, e un ano máis houbo actividades que vós mesmos programastes. Ben... houbo algúns que se apuntaron a ultimísima hora, pero penso que lles quedou claro que ou se participa ou... un queda na aula sen admirar os divertidos espectáculos que cada clase ideou e preparou.

Para empezar, Yanelfy, Alba, Eva e María de 1º ESO fixeron unha coreografía coa canción Euphoria de Loreen.

A continuación Manuel Alonso, de 1º ESO A, interpretou coa gaita unha peza popular galega:

Coa música seguimos, pois catro alumnos de 1º e 2º ESO fixeron un playback.

Tania, Ainoha e Sheila de 3º ESO e Bárbara de 4º ESO cantaron a cappella "Lady Marmalade".

Tampouco faltou un número de ximnasia rítmica a cargo de Nerea (3º ESO) e Yanira, de 1º ESO A.

Miguel Álvarez, de 1º ESO A, tocou o saxo para nós:

O mestre de cerimonia, Alejandro, de 3º ESO, preparou un número de Telepatía, humor e maxia:

Na "repesca", alumnado de 1º e 2º de bacharelato improvisou un bailiño; por alí se colou Íker, de 1º ESO:

Pouco antes de rematar as actuacións entregamos os premios do concurso de tarxetas de Nadal: Roberto Lamas (1º ESO B) e Rebeca López (2º ESO A) levaron o 1º e 2º premio respectivamente. Estaba ausente Alberto Rodríguez (2º ESO A), que acadou o 3º premio.

Pechamos o festival coa actuación do coro do instituto que, baixo a batuta de Marosa Vázquez, interpretou para nós as seguintes panxoliñas:

"Deck de Halls", melodía popular galesa do séc. XVI

"Il est né le divin enfant", popular francesa do séc. XIX




"Na noite máis fermosa", popular galega.



"O carrapuchiño", popular galega.




"Adeste fideles".

Grazas a todos os participantes, asistentes e a todos aqueles que fixeron posible a realización deste festival!

Tarxetas de Nadal

     O EDLG deséxavos que pasedes unhas felices festas de Nadal.

O alumnado de 1º e 2º de ESO elaborou tarxetas para engalanar o noso centro. 

Tertulia de profes

No Club de lectura As catro esquinas de Quinto, sección profes, tivemos a finais de novembro unha cea literaria para falar da obra Menú de enganos de Manuel Núñez Singala.

Gustounos moito esta proposta de Menú, con entrantes, primeiro prato, segundo prato e sobremesa, pois todos os relatos nos deixaban con ganas de máis.  Houbo para todos os gustos, pero neles o engano, o malentendido ou a burla faciánnos seguir ata o seguinte relato (prato). A ver se vós sentides o mesmo ao lelo!!

Ollos de aula

Déixovos aquí unha nova edición da revista Ollos de aula. Nela podemos atopar ideas para os agasallos de Nadal, tamén un enlace para os que vos gusten as ciencias e a tecnoloxía.

Un apartado interesante é a análise de como vai afectar ao ensino do galego a nova lei de educación (LOMCE). 

Dentro do apartado "Palabras do ensino" explícase que é e para que serve o departamento de Orientación.

Desde este enlace mesmo, podedes ollar a revista do mes pasado, que nos trae información sobre o acoso escolar, sobre o que é un proxecto interdisciplinar e suxestións de lecturas.

Labor educativo no Nepal

O día 19 o alumnado de 1º e 2º bacharelato asistiu no Auditorio Municipal á proxección da película Katmandú, un espello no ceo, da directora Icíar Bollaín. O filme está inspirado no labor educativo no Nepal da catalana Victoria Subirana. Despois do visionado, esta mestra catalá falounos dese labor e de aspectos da película que non reflicten na súa totalidade o drama que alí se está vivir.

«Katmandu, un espello no ceo» narra a historia de Laia, unha mestra catalá que se traslada a  Katmandú (Nepal) para traballar nunha escola  a mediados dos anos noventa. Alí descobre unha pobreza extrema e un panorama educativo desolador que, ademais, exclúe os máis necesitados. Tras contraer, ao seu pesar, un matrimonio de conveniencia para legalizar a súa situación, emprende un ambicioso proxecto pedagóxico nos barrios de choupanas da cidade, aínda que pronto se decata de que, para facelo realidade, necesita axuda. Ao mesmo tempo, de forma inesperada, namórase do seu marido. Seguindo a Sharmila, unha moza mestra nativa, emprende unha viaxe ata o fondo da sociedade nepalesa e, tamén, ata o fondo de si mesma. Drama baseada na historia real da mestra Victoria Subirana, unha catalá nacida en 1959, que descubriu que o seu traballo era moito máis útil nun país sen alfabetizar. 

A madrileña Icíar Bollaín é a responsable dun drama protagonizado pola actriz Verónica Echegui no que tamén interveñen Sumyata Battarai e Norbu Tsering Gurung. O guión foi realizado por Bollaín en colaboración con Paul Laverty.

Ficha técnica

Título orixinal: Katmandú, un espejo en el cielo.

Dirección: Icíar Bollaín 

País: España 

Ano: 2011 

Interpretación: Verónica Echegui, Sumyata Battarai, Norbu Tsering Gurung 

Producción: Media Films / Es Docu / TVE / Canal+ / TVE3

Música: Pascal Gaigne 

Duración: 104 minutos

2011: Premios Goya: Nominada á Mellor actriz (V. Echegui) e guión adaptado.

2011: Premios Gaudí: Mellor actriz (V. Echegui)

Parte do alumnado con Victoria Subirana

A actividade foi organizada polo departamento de inglés (vimos a película en versión orixinal subtitulada) e polas titoras respectivas dos cursos de bacharelato.